有叮噹既地方，我又點會唔去呢？
之前藍藍同我講Mega Box有叮噹影，好似好吸引喎！
星期日約家姐返完教會去Mega Box探叮噹，去到德福發現勁多人等車。我諗大家都係去捧叮噹場，真好！
不過去到真係好多人，而叮噹公仔又真係太小，所以影得唔係好滿足。而眼見勁多小朋友，D媽咪要佢地企定望鏡頭，佢地啋你都傻，擺出一副：亞媽係你自己鍾意叮噹之ma，又唔係我，做乜要我同佢一齊影相呀！
跟住仲有d細路在人家影相時，走進鏡頭之內，扶住欄杆勁搖，望見我都好想笑。
當我想行埋一邊等影相時，差d踩到d細路倒瀉既試飲，好險呀！
嗯！場面真係好混亂。雖然我好鍾意細路，見到咁我都係一笑置之，但呢d地方真係唔係好啱我黎！人咁多，點取景呢？冇心機，唯有上五樓影另一些叮噹。
可惜五樓一樣人多，失望之際，再往上走，跟住去到大眾書局，成層樓喎，入去睇下書，書種多、擺書又擺得好，唔錯喎！估唔到呢層最啱我心水。
行完書局就食晚飯，是但入左一間食，叫魯一居，唔啱口味，食左四小碟，走人。
