(我以經打左四次呢篇日記, 唔想再打, 拜託你今次乖乖地、生生性性、醒醒定定同我出現!)
(其實我大可以打係note pad度, 但係我唔鐘意)
話說我同事係頭文字D未落實邊月邊號上畫既時候, 佢已經MARK定我要約我去睇頭文字D, 唔知點解, 我一見到周杰倫三個字, 佢個招牌蒙豬眼, 例牌既歌聲, 我就對呢齣戲無乜興趣, 縱使我早前因為睇過2FAST2FURIOUS而對賽車片產生興趣....
不過, 作為一個好同事, 見佢咁盛意權權咁約我去睇, 我都無乜理由拒絕呀, 所以, 唔知點解, 就約左今晚去睇.... 由於旺角太多人, 間間戲院都爆曬, 爆淨一二三行, 到時D車係螢幕度係咁炒埋黎, 未免太過有壓迫感了吧?! 所以都係退而求其次, 我地選擇左黃埔UA, 點解係黃埔UA? 有去過既人都知道, 黃埔UA有几咁淨, 出面D戲院間間爆, 佢可以仲有九成都係吉, 你就知道, 黃埔UA, 確實係--靜! 不過作為消費者, 睇場戲, 全場滿, 都係咁大個螢幕, 兩條友, 又係咁大個螢幕, 咁多錢, 所以無乜所謂, 靜D反而仲好~ 好自然咁, 攞正第I行15、16中間果兩個位, 務求用最佳既觀看位置去得到最佳既視覺享受.
輪到講齣戲, 講真, 我覺得真係無乜點, 只係0岩0岩好合格, 不過不失, 話精彩又未算精彩, 都打左几個喊露, 話悶, 又唔係好悶, 無乜真係好悶既悶場, 真係ok咋lor~ 但係不得不佩服個導演, 真係夠膽死拍齣戲無乜其他景, 淨係得秋明山, 無乜其他故仔, 淨係一味飄移! 仲要拖到差唔多成兩個鐘! 不過呢.... 佢成日用埋d"fit 下fit下"、"閃下閃下"、"停下停下", 表面上係用黎凝造緊張氣氛、所謂既壓迫感, 事實上... 俗d咁講就係揼波鐘! 人家揼你波鐘就係一part一part咁黎揼, 佢揼你波鐘就係一秒一秒咁黎揼, 平常人未必會覺得有問題, 但係我地呢d燥底既, 就會不其然係心裡暗暗鬧:"fit完未呀?! 閃完未呀!? 停完未呀?! 個人好型咁走出黎fit兩下無所謂, zoom近佢塊臉又要fit兩野, 影個背脊, 又要fit兩野! 就連放係路邊果支旗仔, 都要fit下, 仲要同一個唔知做乜既畫面停頓左兩次, 每次為時零點五秒鐘....究竟...做乜即???! 不過, 亦都要講既係, 故仔真係無乜野, 主線情節, 好多卡通片都有類似鋪排, 精彩全部係曬d角色既性格同對白度, 係最吸引人既地方~ 好難想像, 如果無黃秋生、杜汶澤同鍾鎮濤得閒無事攪下笑, 呢齣戲會悶到咩野情度....
P.S. 個死人同事呀, 話我對眼生得似周杰倫(一樣都係一單一雙), 仲話單眼皮靚! 周杰倫全身最衰都係隻眼, 佢竟然話我似佢..... 男仔就話OK者, 我真係唔覺得, 有女仔會覺得有人話佢似周杰倫係讚緊佢LOR.....