Wednesday 01st October 2003 01:27:30 AM
|  |  31/10/2003 - [ 五 ] | | | | 近排有好勁o既 solar flare, 好多地方都可以見到極光, 仲要係勁爆靚果隻~ 好想去芬蘭睇下D咁靚o既極光, 我諗果種空曠感覺會好正! 出左"假如愛有天意" vcd 啦, 要買啦! 仲等緊"向左走.向右走" vcd, 快D出啦! 而遲D又有新文藝片上啦~ 叫"愛, 斷了線", 睇 mtv 好似幾 ok, 遲D睇下影評如果 ok 都睇得過呀~ | | |
| | 30/10/2003 - [ 四 ] | | | | 今日o既籃球比賽班友仔好勁呀~ 終於見識到鄧鏡波o既籃球~ 因為今日比賽6:00pm先開波, 所以之前我地o係學校練左陣走位, 可能因為咁, 比賽果時默契好似好D, 所以今日我地好順利咁贏波, 仲要贏廿幾分, 我仲打左成一節幾~ 真高興喲! 希望下場都係咁啦, 咁我地就有機會出線啦! 加油! 無啦啦做左聖母無原罪瞻禮o既搞手...... 點算好....... 搞都唔係問題, 最大問題係好難叫班人做野, 尤其係如果要佢地認真果時就真係勞人心智...... 但係聖母無原罪瞻禮都算係 F.7 o既畢業禮, 我唔想求其搞完就算, 如果俾到個值得回味o既回憶佢地, 咁先得呀~ 而且我都想玩得激D~ 聽日都係問下佢地想點玩法, 定係正正常常......(都幾難~) 唔通又黎 twins? cookies? 定係 t.a.t.u.......??? 各位同學仔要撐我呀! 當一個女仔好真誠咁笑果時, 就係佢最靚o既時候啦~ | | |
|  | 29/10/2003 - [ 三 ] | | | | 尋晚瞓得幾好, 所以成功趕走頭痛, 不過仍然要盡量休息多D呀! 今日補完習去搵貓, 唔知係咪D貓怕凍, 得小貓兩三隻, 佢地又唔肯同我玩...... 真係慘....... 後日再去搵佢地~ 希望有得同佢地玩啦~~ 聽日係第二場學界籃球, 希望今場可以贏到啊~ 有時候隨意比刻意好....... 真的喲! | | |
| | 28/10/2003 - [ 二 ] | | | | 又傷風啦...... 好弱...... 一捱夜就有D咁o既後遺症; 放左學都即刻番屋企, 食兩粒 panadol 跟住就即瞓, 瞓左幾粒鐘之後都好番D, 個頭無咁痛, 雖然仲係鼻水長流, 不過唔洗頭痛已經係一大欣賜...... 聽日放假, 可以勁瞓一晚啦! 感動喲~~~ 十月尾啦! 快D到十一月頭啦! 十一月頭可以有番D同大自然親近下o既時間啦! 貝澳, 海下, 城門水塘, 等我呀! 幾日無去探D貓貓...... 聽日補完習一定要去睇下佢地~ | | |
| | 27/10/2003 - [ 一 ] | | | | 好攰呀...... 無乜時間溫英文呀...... 溫到有D暈, 我要瞓覺呀! 尋晚溫到3點幾, 今日好彩有兩堂空堂, 唔係實死...... | | |
| | 26/10/2003 - [ 日 ] | | | | 超開心呀!!! 今日絕對係值得紀念o既日子呀! 鄧鏡波排球隊歷史性二蛋贈筲官!!! 哇哇哈哈!!! 太開心啦!!! 呢一場我地變陣成功!!! 今場我地一傳幾好, 所以即使轉左 seter 都無問題~ 而且班師弟打得幾好, 就算打失左一兩球都好快 recovery 番~ 兩局我地都係打逆境波, 都係追到20分左右先開始反超前, 勁刺激呀! 第二局嬴埋最後一分果一刻真係開心到彈起~ 大佬呀, 記得嬴冠軍果年都要打到第三局先嬴到喎, 今日乾淨利落直落兩局掃走筲官, 真係爽到爆! 打到一場咁o既波做我最後一場學界都低啦! 出唔出到線我都甘心啦~ 不過話是如此, 我地仲有10%可以出線架, 最後計分計成點無人知, 不過唔理啦! 有就當 bonus 打啦, 無就讀書啦~ 今晚聽左 St. Petersburg o既一場 concert, 又係勁正, 佢地 part string 真係靚到無野講, 首 rachmaninov 個 final 勁刺激, 而首柴記 symphony no.4 更加係 show off, 剛柔並濟, 勁喲, 仲 encore 左兩首, 低啦~ 十二月開始有好多 正 concert 呀! 藝術節鄭京和會o黎香港呀! 必聽啦! 荷包出血啦...... 今日真係好開心呀! 感謝主...... | | |
| | 25/10/2003 - [ 六 ] | | | | 終於都睇左"戀之風景", D風景並無想像中咁靚, 不過可能我期望太多, 不過劇情都ok, 但係導演講果隻愛情觀我唔係咁認同...... 愛情應該無得靠努力可以得到喲! 而且佢寫到記掛住已死o既愛情係有問題咁...... 一段感情結束左, 唔係一定要開始另一段掛~ 睇完呢套"戀之風景"又唔知幾時先再有D有水準o既文藝片啦...... 聽日要比賽, 不過今晚都仲要好好溫書啊! 近排已經進步左, 可以比以前更集中咁o係屋企溫書~ 要繼續努力呀, keep going! 老豆都幾無聊, 佢有個朋友個仔今年入左HKU, 就叫佢黎屋企睇下風水, 睇下D野要點放先有利我入大學...... 大佬, 我完全唔信呢D野..... 溫多陣書仲實際啦...... | | |
| | 24/10/2003 - [ 五 ] | | | | 好明顯自己身體係未好得番晒...... 練波果時跳唔起, 不過下手仲有D渣拿...... 我諗星期日都係o係防守上盡力幫手啦, 雖然已經九成出唔到線, 不過始終係我最後一場學界排球比賽, 都係果句, 盡力而為啦!! 終於睇左千與千尋, 好得意啊! 好勁o既幻想, 好 free~ 聽日仲有得睇"戀之風景", 正啊~ Pachelbel canon in D 已經練好最難果四個 bar, 好唔好聽係一回事, 但係最起碼拉到先啦! 其餘果D只要拉得熟就無問題, 俾多一個月就應該可以成到成首啦~ 希望可以越拉越好啦~ 今日阿sir講左一個好重要o既溫書技巧, 可能會成為我拎唔拎到好成績 o既關鍵啊! 呢幾日要好好溫 org chem 喲! | | |
| | 23/10/2003 - [ 四 ] | | | | 呢兩日都好留意身體有無乜問題, 除左小小頭暈, 好彩暫時都無乜大礙...... 應該無事掛, 聽日要練波, 星期日要比賽, 希望頂得緊...... 星期六一定要去睇"戀之風景"! 上左都一排啦, 希望唔好咁多人啦, 俾我放肆D咁發洩喲! 每一次睇番"愛我別走"都忍唔住...... 太感動啦....... 果種感情...... 每一次都將自己代入做阿照...... 雖然唔聰明, 但仍然知道身邊咩人對佢好, 而且會全心對人好...... 水繒...... 世界上有無D咁o既人? | | |
| | 22/10/2003 - [ 三 ] | | | | 今日身體都好正常, 食得行得, 唔覺有乜唔掂, 放學都無去練波啦, 廢事身體頂唔掂...... 維園D貓真係好為食, 一俾野佢地食就肯俾你摸~ 嘻~ 好正呀! | | |
|  | 21/10/2003 - [ 二 ] | | | | 今日o係學校有D中大o既人黎抽血做statictic, 我都報左名, 因為可以順便做個body check, 抽血之前都無乜野, 因為要空肚一晚個化驗先會準,所以係有D肚餓je, 但係到開始抽血啦, 抽到一半就開始唔係好掂, 個頭有D暈, 而且D血唔係好上到腦, 有D聽唔到野仲要標冷汗, 慢慢個情況越黎越差, 當佢地抹我出去瞓底果時, 行果幾步路都差D趺底, 又睇唔到野...... 而且有一刻我係覺得就要失去知覺...... 好彩當我瞓底之後, 我feel到D血上番個腦, 睇番同聽番到野~ 果一刻我真係諗會唔會死, 覺得就咁死左咪好唔低...... 不過點都好啦, 上主唔俾我死總有原因....... 跟住個姑娘見我好番好多, 就話要我再抽過, 我問佢會唔會有事, 佢話唔會, 咁我都相信佢o既, 佢點都係professional掛, 當然啦, 第二次抽, 俾隻左手佢抽, 今次好順利啦, 無暈到...... 跟住留埋尿俾佢地就番去上堂~ 經過咁野一搞, 兩隻手臂都好攰, 個人都好虛...... 或者我真係唔係運動o既料子, 話唔定個化驗報告出黎之後, 會驗到我好多暗病都唔定......
今次係我第二次同死神 say hi, 咁大個仔都係試過兩次, 而且都係o係今年發生...... 不過只要死唔去, 呢種感覺每一次都令我更加覺得人命真係好弱雞, 好好珍惜...... | | |
| | 20/10/2003 - [ 一 ] | | | | 今日放學練波時, 講真, 多少有D意興闌珊...... 不過黃sir就係有一種打不死o既精神! 而且佢提醒左我, 星期日果場波可能會係我最後一場o既學界比賽...... 而家先係十月, 咁快就已經出現第一個最後一次, form 7啦, 呢年將會不斷有好多最後一次, 如果我唔好好珍惜, 可能會好後悔...... 好!!! 俾心機打埋佢啦! 橫豎都係最後一次, 拚老命啦! 今個禮拜開始要花D時間落英文度...... 背下生字好, 做下 section a or section a 又好, 總之要逼自己接觸多D英文, 英文唔可以有咩意外架! 天氣乾燥, 右手D手指勁爆, 好痛呀! 反而左手無乜事, 可能左手禁的絃多, 皮厚所以無事...... | | |
| | 19/10/2003 - [ 日 ] | | | | 今日無去睇"戀之風景", 因為起唔到身, 太攰, 太眼瞓啦...... 算啦, 下個星期六唔洗打波, 咁就下星期六先去睇啦~
十月尾會有幾個測驗, chem 方面要測成個 org chem, 相信唔會太難, 而D同學仔會背到好熟...... 我都要加油啊! bio方面有4個chapter, 兩個唔會太難, 其餘兩個難DD, 內容都唔少, 要開始溫啦!
近來突然好多花費...... 真係慘...... | | |
|  | 18/10/2003 - [ 六 ] | | | | 今日對衛理, 終於輸啦...... 唔憤氣呀!!! 主要係輸一傳...... 唔憤氣唔係因為上兩場班師弟都打得有板有眼, 但係今場見到人地有兩個勁o既大搥, 佢地就恊場啦...... 我都好努力咁幫佢地又飛又撲, 但係始終唔掂...... 唔憤氣又因為我信我地學校D人唔係咁渣, 如果有一個場俾我地D學生好好咁練波, 一定會好好多...... 黃 sir 咁俾心機同我地, 班仔都算有心...... 我唔係輸波賴地爛, 但係連一個標準o既排球場都無就真係...... 而家其他學校可能會覺得我地學校好唔長進, 拎過一次冠軍之後D水平就一路跌...... 唔甘心呀!!!
聽日去睇"戀之風景", 預左又喊啦...... 不過都好, 發洩下D情緒. | | |
| | 17/10/2003 - [ 五 ] | | | | 今日終於派番個"棋王"續寫故仔, 有78分, 最高果個好似係82分, 都唔錯喎! 范小玲俾o既評語係:
程凌畫畫, 神童學棋, 兩條線索交相發展, 未說明興趣, 意志是棋技提升的關鍵! 文末對"王"的解釋頗俱哲理.
可能第一次寫小說啦, 始終有D佈局未處理得好好, 不過已經好開心啦! 因為真係好盡力咁寫呢個故仔喲!
今日放學練波, 有D唔係咁集中, 有D攰...... 死啦, 聽日仲要打學界, 今晚要早D瞓啊! | | |
| | 16/10/2003 - [ 四 ] | | | | 今日決定左學校旅行去烏溪沙, 原本有人提議去長洲, 但因為大部分人都想入 camp, 而長洲D渡假屋唔係咁掂, 所以無咁多人投票, 最後決定去烏溪沙, 無乜所謂啦, 橫豎我都唔入 camp, 去都係行下就走人~ 不過去呢D日營就無得影相~ | | |
| | 15/10/2003 - [ 三 ] | | | | 終於開始 feel 到 org chem o既好玩之處, 可能慢慢咁背得熟左D, 當成功做到個 synthesis 之後會有好大滿足感, 尤其係D奇形怪狀o既compund, 幾得意下~ 而家對入 biochem o既決心又大D啦!
人生第一場學界籃球比賽輸左...... 人地進攻同防守都好有系統, 但係我地就亂咁黎...... 真係無個大場練就差D~ 可惜......
英文個 miss 叫我要做D額外o既英文習作, 可能佢見我D英文真係太水皮...... 我都無乜所謂, 做多D, 英文會好D掛~ | | |
|  | 14/10/2003 - [ 二 ] | | | | 唔好講笑, 今日真係凍左唔少, 尤其入黑之後, D風都好勁, 不過幾舒服呀~ 爽D, 個人都唔會流咁多汗~
聽日將會打我籃球o既第一場比賽, 我呢D二打六應該都有機會出場掛~ 希望可以嬴啦!
今日放左學之後死頂睇瞓, 成功溫番多D書, 一陣再接再厲! 好快 BIO 會有統測, 其他科都相信會有測驗啦! 要快D溫書先得~ | | |
|  | 13/10/2003 - [ 一 ] | | | | 哎呀~ 呢度個收市今個月真係麻麻, 可能早排隔左幾日無寫, 所以D人以為我唔再寫~ 不過算啦, 我又唔要寫俾D咩人睇, 有無人睇又有乜所謂呢~
今晚個天氣可能會勁跌, 得番二十零度左右, 大家要小心喲~
今日成日都好攰呀...... 好想好好咁休息番幾日, 不過我諗呢個願望都要等到最快十一月先有可能實現...... | | |
| | 12/10/2003 - [ 日 ] | | | | 今日對張振興, 真係恐怖! 第一局我無出到, 因為阿 sir 話想收埋後二, 下場先出番, 我無乜所謂, 俾班師弟打多D囉~ 一開始係落後緊, 不過佢地都算幾定, 一傳都ok, 所以慢慢都追番, 然後驘埋, 佢地真係進步啦~ 第二局一開始情況差唔多, 都係落後, 我都地咬住咬住, 不過一路都反超前唔到, 到左人地已經21分, 我都出番去, 不過輸緊成6-7分, 追到我地21-22分始終追唔到, 結果輸番一局...... 第三局打番定D, 我都唔係好敢大力打, 寧願打多D安全波, 反而對面就開始自亂陣腳, 所以都好彩可以 lead 住黎打, 最後有驚無險下贏左~ 真係正! 張振興比以前進步左, 定左好多, 真係唔講得笑~ 不過唔理囉! 贏到就得啦! 下場衛理, 佢地兩個大搥好勁, 不過其他就麻麻, 只要我地攔網攔好D, 一傳又好似今日咁, 咁都仲有力一戰!!!
打完波好攰呀! 仲要溫書...... 眼瞓死啦! | | |
| | 11/10/2003 - [ 六 ] | | | | 又可以o係網上寫番日記啦! 真係好, 唔洗o係 notepad draft~
今日開公大吉, 第一場o既學界排球, 對手係 island, 雖然佢地o既反應真係好快, 但係始終欠缺基本技術; 第一局幾好, 幾輕鬆, 只係俾佢地拎左11分, 第二局開局都唔錯, 一開始仲10比0, 我都殺左幾球勁野, 但係可能嬴得太多, 鬆懈左, 之後俾佢地追左唔少分數, 不過最後都無乜問題下ko左佢地~ 聽日係第二場, 張振興, 雖然有D攰, 不過加油啦!!! | | |
| | 10/10/2003 - [ 五 ] | | | | 終於搞掂部腦啦!!! 由 ME 轉左做 XP, XP 個介面真係好靚, 好鍾意啊! 而且 scandisk 都好快, 又穩定左, 正啊!
今日無啦啦打 friendly, 對 sjs, 我地打得都算ok~ 不過阿 sir 呢個時候約打 friendly...... 聽日仲要打鬼仔,有D疲. | | |
| | 09/10/2003 - [ 四 ] | | | | 今日公佈o既諾貝爾獎化學獎, 成就係用 x-ray deffraction 發現 cell membrane 上面果D transmembrane protein, 個成就似 bio 多D~ 不過其實 molecular level o既 bio 都係同 chem 差距唔大, 所以我就算下年走左去讀 chem, 而唔係 biochem, 都一樣可以研究D同生物有關o既 topic~
後日就開始學界比賽啦! 第一場係鬼仔 island~ 又要勁辛苦啦! 第二場係張振興~ 佢地俾我o既印象仲係 F.2 第一次打學界果時o既感覺...... 不過唔可以輕敵, 話唔定人地進步左好多都唔定~ 然後下星期三就到籃球第一場, 都係鬼仔, west island~ 應該幾好玩掛~
後日打完波一定要去 POLY orientation day, 要問清楚科 medical lab science 係乜傢伙先得!
差唔多搞掂 backup, 係時候可以 format 部腦啦!! | | |
| | 08/10/2003 - [ 三 ] | | | | 諾貝爾獎呢幾日公佈, 尋日係醫學及生理學獎, 貢獻係磁力共振; 今日個頒物理學獎, 又係超導體同超流體, 其實呢個領域仲有好大發展空間, 真係好想快D睇下超導體幾時可以發展到可以o係室溫度~
天氣涼左, 訓覺舒服好多~ 朝早有D唔係咁想起身~ 嘻~ | | |
| | 07/10/2003 - [ 二 ] | | | | 今朝起身果時又再 feel 到天氣又凍番, 頭先仲要聽到收音機天氣預報話下星期會再凍D, 秋天真正咁黎啦!
十一月有好多 field trip 玩, 海下灣, 大浪後灣, 兩個已經定左o既目的地, 仲有學校旅行, 正啊! 可以影相啦!
買左新簿仔, 可以開工啦! | | |
| | 06/10/2003 - [ 一 ] | | | | 今日又打 friendly 啦! 真係忙~ 今次對手係聖貞德, 都打過幾次啦~ 佢地好似無乜進步, 仲好似退步左...... 不過我地都唔算太好. 第一局個個都牛牛下, D一傳周圍飛...... 最後仲要輸幾分...... 第二局佢地出 B grade 同我地玩, 對住我地班 A grade, 無啦, 水平唔同, 一陣就玩完~ 第三局同四佢地出番 A grade, 我地打番似樣, 所以幾輕鬆之下就贏左; 不過我發覺我地一傳同防守仲係麻麻, 雖然班師弟已經進步左幾多, 如果佢地肯落D苦功, 打波時投入D, 再加多D經驗, 其實係有機會拎牌架~ 希望佢地俾D心機啦!
竟然俾我o係學校天台發現隻貓仔, 應該係養左好耐啦, 都幾老, 不過佢好似好驚著白衫白褲o既學生, 一行埋去佢就走, 我只係試過o係啊姐抱住佢果時先可以摸到佢一下~ 唔, 要好好同佢陪養感情啦~
好煩啊! 部腦個 I.E. 同 Outlook 都死左, 呢幾日o既日記都係 notepad 打住先, 要遲D先可以補番上去. | | |
| | 05/10/2003 - [ 日 ] | | | | 連續五日o既假期就咁打柴, 真係快樂不知時日過, 今個假期D bio 溫得幾好, 不過 chem 就麻麻...... 呢幾日要俾D心機補番先得~ 呢個星期會好繁忙喲!
"戀之風景"10月16號上, 睇過廣告片, 景靚之餘, 劇情好似都唔錯, 必睇啊!
十一月頭 bio 會有 field trip, 又有學校旅行, 可以影相囉! 期待啊! | | |
| | 04/10/2003 - [ 六 ] | | | | 今日開始我會耐唔耐就o係討論區 post D歌詞出黎, D歌詞都係曾經俾過我好多啟發, 而且某程度上係我感受o既反映...... 得閒去睇下啦......
嘩! 竟然有小強o係我間房出沒!!! 平時我間房雖然係亂D, 但係點都算乾淨, 太可怕啦! 但係我又唔忍心打死佢...... 係咁搵野趕佢走又走番黎=.=...... 仲要爬上我隻腳...... 你咁樣唔得喎...... 如果訓覺果時俾你爬上身咪...... 無可奈何之下, 唯有判佢死刑, 對唔住...... 原諒我啦, 安息啦...... 奠...... | | |
| | 03/10/2003 - [ 五 ] | | | | 今日同 QC 打 friendly, 我地竟然贏到佢地一局!!! 話晒都係 devision one 上年o既冠軍, 唔錯唔錯, 不過我地o既一傳都仲麻麻, 同埋D師弟有時都幾情緒化, 所以表現有D唔係咁穩定, 佢地D基本功亦唔係咁定, 如果佢地可以再打得定D, 學界真係有機會出線呀!!!
要努力存錢呀! 目標係$7000, 存夠$7000就都差唔多考完AL, 到時就即買二手 Canon D60 + 50mm f1.8/II, 諗起都開心喲!!!
今日有個蘇浙o既同學話我知佢終於可以完成夢想, 入音專讀音樂, 應該係 piano performance, 真係好喲!!! 佢之前因為屋企同身體有D問題, 所以退左學, 無讀 F.7...... 我果時真係覺得好可惜, 不過而家聽到佢可以讀番書, 仲要係音專, 真係好欣慰啊! 感謝主...... 身邊一個好勉勵o既例子~ 我都要俾心機喎! | | |
| | 02/10/2003 - [ 四 ] | | | | 今日水運會, 做終點裁判幾好呀, 睇下人D名次, 寫幾隻字就ok啦~ 而且有得坐, 唔洗晒, 好過做計時員呀! 不過最後一年, 下年無得玩啦~
十一黃金週咁快就過左兩日, 要加緊溫書喲, 溫得太慢會溫唔晒咁多....
呢度其實應該有人係定期咁睇, 但係又無 人留言, 討論區又無回應, 我見 dialogue 其他 都有 300-400 瀏覽人數果D 日記有好多留言...... 喂! 如果你係有睇開o既, 不仿留個 message 呀! 唔好得我吹咁無聊...... | | |
| | 01/10/2003 - [ 三 ] | | | | 今晚無去補 chem, 去左聽 Pogorelich o既 recital~ 不負所望, 佢彈o既 Beethoven 真係正~ 好似有千言萬語想講, 而且佢o既琴音好細膩, 聽得好舒服, 而佢o既 Rachmaninov 竟然出奇咁慢, 不過慢有慢好, 就好似D國畫, 有"留白"o既地方, 俾好多想像空間我地, 佢 encore 得一首歌咁大把, 唔係幾夠皮喎~
聽日水運會, 一如以往啦, 做工作人員, 不過今年做終點裁判, 應該好玩D掛~ |
|