今日同Pat Pat為了一間糖水店而專登出了佐敦工作，不用影相，好快就搞掂晒！不過都成三點先出到去！兩個都未食lunch，於是又挑選了一間作為目標，睇下幫襯完可唔可以成為我地旗下的一間商戶啦！最後揀了一間食星馬菜的餐廳，其實呢間上星期已經來過，但負責人剛剛放假，今日再試多一次，我地叫了一碟炒蘿白糕同埋炒河，味道唔錯既！但埋單後一問之後就非常之失望！因為負責人又係放假！又會咁橋既！唉！唔通佢係逢星期三就放假？之後去左幾間負責人咁岩都唔係舖頭，都幾黑仔！最後幸好皇天不負有心人，都俾我地成功咁開多一間粥店！
呢間粥店老闆娘都唔錯，都幾受街坊歡迎，不停都有好多人幫襯，佢話係物超所值嘛！個個一入到去未坐低就已經叫定魚粥！食客都好識貨！反而我地兩個就真係唔識貨，唔試下佢出名的魚粥添！老闆同老闆娘係咁叫我地試下佢地既粥，雖然剛剛先食完星馬菜唔夠一個鐘，但人地咁熱情又唔好意思再推搪，所以少少地兩個人share一碗皮蛋牛肉粥，唔係誇讚，真係與別不同既，味道已有鮮甜的魚味，沒有味精不是太咸，但亦唔會太淡，味道剛剛好！佢地剛剛開始籌備改名，但街坊食客好似對此有些微意見，話好地地做咩要改名呢！好似原名仲好d喎！哈！
今日是一個重要的日子，因為是結婚兩週年紀念，時間真係過得好快，眨下眼就已經兩年了！不過近呢排覺得同老公感情越來越好，日益增加，都係好事來的！希望以後都唔會再有鬧交的情況出現就好了！其實係發覺佢亦都越來越錫我！自己開始老了，樣子身形都變了，但有老公在身邊不離不棄仲覺得我好似細路女咁應該是一件幸福的事！放工後相約左係尖沙咀等，然後一齊去左食法國菜，當然係去我們其中一間商戶度用下自己公司的優惠咭啦！有九折，折實了都平左二三十蚊都幾抵！印象中好似第二次食法國菜，還是第一次呢？第一次好似係同舊公司一齊去食既！總之同老公是第一次啦！間餐廳環境都不算太差，雖然唔係特別高級，但服務就俾足100分既！至於食物呢，我地公司介紹得既又點差呢！嘻嘻！主菜我揀了鴨胸，佢就揀了牛扒，味道都有咁上下水準既！短短幾小時內食了咁多餐，其實真係好飽！食完後老公帶我去食了一杯雪糕呢！呢度既雪糕又真係幾特別喎！聽聞是人手搞的，幾香滑！但真係好似飽得制了！
