昨晚去左睇容祖兒演唱會，返到來都過了十二點了，然後沖涼分相，所以都唔得閒寫日記添！唔緊要啦！今日補返寫都一樣唶！個演唱會梗係好睇啦！我好耐好耐無睇過演唱會了，咁大個女都係第二次睇演唱會咋！今次都唔知點解咁捨得既！哈哈！以前自己不嬲都係好慳，但近來好似就闊綽左，或者覺得係時候要享受下啦！第一次睇演唱會係同屋企人去睇既！就係梅艷芳的告別樂壇演唱會喇！所以尋晚真係特別興奮，最開心就係有得一邊欣賞一邊影相嘛！不過呢，好快就得返一隔電，成日驚隨時無電，都唔敢亂來！好彩朝早影餐廳相時用Pat Pat舊電咋，如果唔係肯定到夜晚都頂唔到咁耐了，都唔知點解舊電消耗得特別快既！就算張memory card有2GB都無用啦！根本無電咁多memory都用不著！所以呢個時勢我話乜都唔應該再買住，最緊要買多舊新電先！呢樣先係重點所在呀！容祖兒落來握手時我即刻標出去，好彩都同佢握到唶，好搞笑呀，有些人扯住唔放，想扯斷佢隻手咩！真係奇怪，明星歌星之嘛！咪係人一個，本來都係普普通通的一個女仔唶，但一紅起上來又會咁受歡迎既！佢雖然個樣就無話特別靚，但身材就真係幾索囉！可以keep得咁fit，羨慕死我了！
本來諗住臨去演唱會時，去紅磡都會商場那間台式料理度食晚飯既！但點知最後都係在尖東度食，不過都一樣係食台式，本來都唔係咁想食台式既喇，因為lunch先同Pat Pat食完，唔想夜晚又食，但係尖東果度又無咩好食，可能加上我病緊又無咩胃口，一係就貴野，平野又多人又熱既車仔麵我又唔想食，因為我都唔食得辣住！不過橋得幾交關，lunch同Pat Pat入左佐敦那間唔記得叫蝴蝶什麼的台式餐廳，呵！原來係同茶軒屬同一集團的，因為伙記都係著茶軒的衫，千揀萬揀諗住揀間有潛質的來食，食完順便sell佢會順利些，點知入錯左，因為老細一定唔會在舖頭啦！夜晚就真真正正去左茶軒度食喇！但食物款式係一模一樣，我夜晚叫既都同lunch叫既一樣，只係lunch就叫麵，夜晚就轉左飯，不過以後都唔會再去茶軒到食，因為一來d野都唔係咁特別又不是太好味，二來叫了杯熱青蘋果綠茶，太甜了好難飲呀，最唔好的係我等了成四五個字食物先送到囉，催了幾次！我地趕住去演唱會嘛！仲要我地咁等法，搞到我要食得好趕囉！
講返lunch，都成三點幾先食，因為約左個客三點影相，但我地早到左少少，不過影完都無得食既！所以唯有食自己啦！食完四點約左間甜品店，好快地就幫佢登記完仲肯整幾款甜品出來俾我地影相呢！成六款甜品呀，影完仲有得俾我地試食添呀！兩個人試六款甜品真係好誇張，仲要岩岩先食完lunch，真係好飽滯好漏，但又唔可以唔試咁唔俾面喎！同埋每一款甜品的賣相都咁靚！老闆娘仲沖了每人一杯果汁俾我地飲呢！真係客氣好人！其實好多時都遇到d咁好既老闆既！都已經算好幸運既喇！我發覺我味覺好似有進步了，慢慢品嚐後可以食得出佢用咩材料，好似那個梳乎里我一食就覺得有薑味，原來係岩的！有進步呢！我諗我地真係可能可以慢慢地培養成為食家呀！
昨日朝早終於忍不住要去睇西醫了，不過藥力好勁，會令人眼訓外，真係四肢無力般，手軟腳軟，連寫隻字都感覺雙手係度震緊，好似唔係自己的，有點不受控添呀！所以影出來既相都不是太好！但我真係憑住意志力撐住咋！夜晚聽演唱會又係，初時都無乜野，後來真係都感到個人好累好累！四周咁暗已經難影，唔夠光平時都會手震啦！加上藥力令我隻手特別容易累，仲要部機鏡頭又長又加了閃光燈真係好重，但我而家好似拿慣左重既相機，太輕的反而仲更加不習慣添呀！不過都有一兩張係影得好既！都幾滿意！本來如果佢成日向住我地就可以影多d，但佢好多時都背住我地既，到向住我地時，時間又短，又成日郁身郁勢咁，影相動作真係要好快先得囉！
